بهار و یار

گوش سوز بلگ* لیمو، چپ چپ باد باهار

شونم فیس علف، سایه ی خش دارکنار

عطرشب بو، عطرشیشه، بوخش بی فاطمه

پولک گل-خوردک*، گل-منگلی*، می دنگ نار

رخص* غله زیر اَفتو، شُراَشَرّ ِ او تِه جو

نالِ-نال نین زَمبَی-زار* و خوف بیشه زار

چادری* هی می و می شو دورگل منت کشی*

عطر بوسونی گرخته، رهته تا پوی آبشار

رُفت و رو می که کللر، مله* می که گازریک*

چینه* می کو کلکلیتی*، بلبلی ری پرز خار

تُپ تُپِ او تُپ* مونی بارونِ نازِ نم زلال

حوضک اِشکفت پر او سردسرد چارچار*

یارک بالا بلند مس سوزینه ی شکیل

نازکِ، میزونِ، شنگ، فرز بی عیب تیار

نیدلِ ره رهتن ی نی بی کوگ مسِ پیروا*

سَرو مغمی* شسه سایه، زیردس قد یار

میرشکال* برگ کال و چشم کال گاکده*

رفک مرزنگِ ی و چشم ی هف برار* و یه خواهار*

میشِ مسِ سِرتوال* زیربید مارگون*

آفرین گردآفرین، بی مشق برنو بی قطار

گردری* و سینه ریزی حسرت شمس و قمر

تالکِ ی* سی ما هلیدو* بی، سه دشمن نشت مار

گرمِ گرمِ لار مسی گرمسیربیبهو

دل ته پاتووه* ی غم عشقی اسیروبیقرار

شانشین گردنی، ری چشمه بلقیس چروم*

عطر تالی شسه بینه ی بو چویل* دم-چنار*

گل-تش* سیلی تِه لارم، سورسات زندهی

لووشی، دشت شقاق سینه کرده داغدار

زنگ بی حرف گپی طهر نسیم بُنگ صب

یا صدی مظراب لوطی*، زنگ سیم زرد تار

هه خدا گل بی، باهارم بو، عباسَ م شسه بو؟

طوم اَرس شوق و شوق چشم سی مس خمار

شاعر : عباس سلطانی

نویسنده ی مطلب : مهدی نصیرپور